Die Oes Wag
Carla Marias
’n Herinnering dat die oes nou gereed is en dat jy geroep is om te sien, te luister en met vrymoedigheid uit te gaan.
Matt 9:37-38
Die wind waai sag oor die veld… en as jy mooi kyk, sien jy dit - die oes is ryp. Nie eendag nie. Nie later nie. Nou.
Jesus sê: “Die oes is groot, maar die arbeiders min.”
Dit is nie net ’n waarneming nie - dit is ’n roepstem.
God het jou nie net gered om veilig te wees nie…
Hy het jou geroep om te gaan.
Om oë te hê wat sien waar ander nie sien nie.
Ore wat hoor waar ander afgestomp geraak het.
’n Hart wat brand vir mense wat nog nie weet nie.
Die wêreld is vol mense wat dors is vir waarheid, vir hoop, vir Jesus en jy dra die antwoord binne jou.
Dis jou opdrag:
Nie om stil te bly nie.
Nie om terug te hou nie.
Maar om met vrymoedigheid uit te gaan.Jy hoef nie alles te weet nie.
Jy moet net beskikbaar wees.
Want wanneer jy stap in gehoorsaamheid, sal die Here self die oes bring.
Vandag, kies om:
Jou oë oop te maak vir die mense rondom jou.
Jou ore oop te maak vir die Gees se leiding.
Jou mond oop te maak om waarheid in liefde te spreek.
Die oes is gereed.
